لماذا نأكل خبز الحبة الكاملة؟
عمرك سألت نفسك ليه أجدادنا زمان
كانت صحتهم حلوه وبياكلوا رغيف العيش وهما مرتاحين، وإحنا دلوقتي أقل لقمة بتتعبنا
وتنفخ قولونا؟
الحكاية مش مجرد لقمة بناكلها، الحكاية
إننا بقينا بناخد "طاقة فاضية" ورمينا الفايدة،،
ربنا خلق حبة القمح فيها 3 أجزاء
١ـالنخاله او الرده الابحاث بتقول انها بتساعد
في الهضم، وتخلي السكر في دمك مظبوط.
٢ـالجنين ودي فيها الزيوت اللي بتغذي شعرك وبشرتك
ومخك، وفيه فيتامينات المناعة
٣ـالنشا وهو ده اللي بنطلّع منه الدقيق الأبيض
زمان قبل سنة 1870، كان القمح بيطحن بحجارة
كبيرة، فكانت الحبة بتطلع كاملة بفايدتها ويتعمل منها الخبز بخيره .
لكن مع المطاحن الحديثة، قرروا يفصلوا
"الرده" و"الجنين" عن القمح ويفضل النشا اللي هو الدقيق الابيض
عشان يعرفوا يخزنوه فتره اطول وشكله يبقي حلو ، فكده أخدنا "نشا" بس، ورمينا
الألياف والمعادن اللي جسمك محتاجها عشان يشبع ويحرق صح!
والنتيجة؟ الدقيق الأبيض بقى بيدخل جسمنا
يعمل "دوشة"! يرفع السكر للسما، فجسمك يتخض ويطلع إنسولين كتير، فالسكر يقع
فجأة.. وهوبا تلاقي نفسك جعت جوع مفاجئ وعاوز تاكل أي حاجة قدامك، وكمان تحس بخمول
وتقل في الهضم لدرجة إنك عاوز تنام.
إحنا حرفياً بناخد "طاقة وهمية"
وبنرمي "الكنز" اللي بيشبعنا ويغذي شعرنا وبشرتنا ومخنا. الحكاية مش حرمان،
الحكاية إننا نرجع للطبيعه والطيبات اللي ربنا خلقها.
جسمك أمانة، وهو بيفهم "لغة الطبيعة" أكتر لما ترجع تاكل القمح الكامل (العيش الأسمر، الفريك، البليلة)، أنت بترجع لجسمك "الكتالوج" الأصلي بتاعه.