قصة جندي مقاتل في حرب أكتوبر73
المرحوم / إبراهيم عباس العربي
كانت نيران الفرقة 39 أول نيران مصرية تطلق في سيناء بعد
نكسة 1967،وهذه الفرقة التي تتكون من أكثر من ألفين فرد وقت العبور كما حكي لنا بطلنا المرحوم /إبراهيم عباس العربي الذي نحن بصدد الحديث عنه وهو فرد صاعقة في هذه المجموعة التي كونها العميد /إبراهيم الرفاعي ..
كنت كلما جلست مع صديقي إبراهيم طلبت منه الحديث عن حرب أكتوبر؟
وكان يحدثني وهو فخور بمافعله فخور بقائده ابراهيم الرفاعي لدرجة أنني أحببت الشهيد الرفاعي من كثرة حديثه عنه ..
قال لي /إبراهيم إنه تم تجنيدي عام 1968م بعد النكسة مباشرة والتحقت بسلاح الصاعقة وكنت في البداية بالمجموعة 129 وكان فيه مجموعة أخري 127 في الجيش الثاني والثالث ..
وبعد التدريبات تم اختياري أنا وعدد من الجنود للالتحاق بالفرقة 39 بناء علي اختيار العميد ابراهيم الرفاعي ..
فكنت أقاطعه وأسأله طيب عمل الصاعقة دي إيه ؟..
فيقول :" الصاعقه تعتبر مهمتها الأساسية الشغل خلف خطوط العدو عمل كماين أو تدمير محطات رادار أو مراكز قيادة خلف خطوط العدو أو تدمير أى أهداف حيوية أو إحضار عينة من سلاح العدو وعمل غارة والانسحاب بأسرع وقت حتى لايقع بها خسائر..
فقلت له :"يعني اضرب وارجع لإرباك العدو ؟
فقال لي:" بالظبط اضرب وتخلص من المعركة بسرعة قبل ان يحشد لك العدو قواته للقضاء عليك ، ولا تتمسك بأرض ..
ولكن الفرقة 39بقيادة ابراهيم الرفاعي كانت عملياتها مصدر رعب ودمار لإسرائيل في الأفراد والمعدات، ومع نهاية كل عملية كنا نحس بمنتهي السعادة وكان المرحوم/إبراهيم الرفاعي يبقي سعيد وعايز عملية غيرها وغيرها ولكن كان يكافأنا بأجازة 10أيام ونرجع نعمل العملية التانية بس بعد تدمير القطار اللي كان فيه عساكر وضباط إسرائليين عند منطقة الشيخ زويد عطانا 15يوم أجازة.
قلت له :"دا كان في حرب الاستنزاف قبل اكتوبر حدثني عن حرب أكتوبر ..
قال:" دا كان فيه شغل قبل أكتوبرعلي أعلي مستوي
يعني بعد نسف قطار لاسرائيل عند الشيخ زويد خدنا أجازة 15يوم وبعد رجوعنا طلعنا لنسف مخازن الذخيرة اللي تركتها قواتنا عند أنسحابها في 1967، وكان نجاح هذه العملية شبه مستحيل. ولكن تمكنا من الوصول لها وتفجيرها حتى إن النيران ظلت مشتعلة في تلك المخازن لثلاثة أيام متصلة.
ووصل العميد/ ابراهيم الرفاعي خطاب شكر من وزير الحربية على المجهود اللي عملته المجموعة. وكان يقرأ لنا الخطاب علشان يشجعنا..ويحفزنا علي العمليات القادمة ..
طيب المجموعة 39 دي كانت كم فرد ؟
قال :" كنا عدد بسيط لايتعدي ال200فرد بس لما اتشهرت الفرقة 39 وذاع صيتها كان جنود كثيرة عايزه تنضم لها لأنه كان وقتها شرف كبير كله عايز ينضم لنا ..وزادت العمليات الناجحة داخل سيناء المحتلة ..
ونسيت أقولك المجموعة لحد دلوقت ماكانش اسمها 39 هي تم تسميتها فرقة 39قتال، من يوم 25 يوليو 1969 وأختار الشهيد إبراهيم الرفاعي شعار رأس النمر رمز للمجموعة، وقال يومها الشعار ده اللي الشهيد أحمد عبد العزيز كان عامله شعار في معارك 1948.
قلت له :" انت بتشوقنا للشهيد/ ابراهيم الرفاعي ده دا كان بطل بالفعل وعمل أعمال خطيرة وعظيمة وانتم معه..
يقول لي :" إزاي ماقرأتش وما تعرفش عن ابراهيم الرفاعي واللي عمله دا كانت إسرائيل تخاف من اسمه وكان عبدالمنعم رياض نفسه يبعت له يعمل معه اجتماعات وكان جمال عبدالناصر يشكره بالاسم ..
طيب هاقولك :" لما اسرائيل كانت تجيب صواريخ ولاأسلحة جديدة كان عبد المنعم رياض يطلب منه عايزين منها عينة صواريخ يا رفاعي بأي ثمن لمعرفة مدى تأثيرها على الأفراد والمعدات في حالة استخدامها ضد جنودنا". ويجي يعمل اجتماع سري ويبدأ يخطط وما ينامش.. يتحول الرفاعي إلى جمرة من اللهب.
طيب ياأبا خليل :" جبتوا عينة من الصواريخ دي ولاعمل ايه الرفاعي ..
هاقولك الصراحة أنا ماروحتش العملية دي بس كان نفسي أروح ولكن كنت تعبت وباخد علاج وكان بدأت الأعداد تزيد في الفرقة ويعتمد الرفاعي علي ناس ويديهم ثقة ..
قلت له يعني أنت ماروحتش بس اتنفذت العملية؟
قال:" ماكنش ينام الرفاعي دا راح وعبروا قناة السويس بالليل
بعد ما قعد أسبوع يخطط ما كنش يسيب حاجة للصدفة أو يقبل بالفشل.
قلت له شوقتنا عمل إيه؟
قال :" هو طلع ومعه مجموعة بعد العشاء وبأسلوب الرفاعي السريع استطاع أن يرجع قبل الفجر بثلاثة صواريخ ومعه أسير جندي اسرائيلي ..
قلت له :" دا كده اسرائيل مانمتش علشان العملية والجندي دا عندهم الجندي ده بألاف ؟
قال :" فعلاً سمعنا أنه تم عزل القائد الإسرائيلي المسؤول عن قواعد الصواريخ. لأن الأسير ده مش عسكري دا كان ملازم قالوا اسمه شمعون. وبطل المصارعة في الجيش الإسرائيلي والرفاعي جابه من قفاه .
وكنت اقوله :"أنا عايز اسمع واكتب لك قصة أنت والرفاعي ده
كان يقولي :" مهما كتبت والكل كتب عن الرجل ده مش هتديوله حقه كان أسطورة الله يرحمه ..
فكنت اقوله :" هسيبك وعلي وعد تكملي ..
ويتغير الحديث ..
ولكن ما كنتش اسيبه كان يحكي لي حاجات مرعبة وحاجات مبكية وحاجات تفرح ..وحاجات وحاجات ..
هنقول فيها بعدين علي أمل اللقاء بكم
#انتظرونا